中環在線:米奇帶喜羊羊闖世界
本地動畫公司意馬國際( 585),前幾年搞阿童木搞極都無起色,點知一畀「紅籌之父」梁伯韜入主後成功「吞羊」,成間公司即刻死過翻生,家仲鬼咁多動作㖭!繼幾個月前先一口氣簽咗兩項授權協議後,噚日公司又再宣佈,會開拍《喜羊羊與灰太狼》的第四套電影,今次仲史無前例咁搵埋迪士尼合作,簽迪士尼做中、港以外嘅全球電影發行商,實行帶喜羊羊衝出神州,向世界出發!
新角色小龍教功夫
大家喺出年春季就可以睇到呢套新作。除咗電影院嘅發行外,迪士尼今次亦會做埋呢套電影喺中、港、澳、台灣嘅電視、互聯網、移動平台同其他新媒體嘅發行,實行有咁大發咁大,力谷周邊產品銷情來吸水啦!不過迪士尼出咗名無寶不落,加上以佢喺全球院線嘅影響力,睇怕今次意馬同佢合作,分紅嘅條件都會好辣!
不過,意馬旗下嘅動漫火車營運總裁張玲兒就同華華講,佢一定唔會形容迪士尼嘅條件做「辣」,雖然實際分成嘅比例唔可以講,但總之係大家都非常滿意咁話。
張玲兒仲透露,今次套戲會使 200萬美元左右,全部由佢哋投資,迪士尼只係會提供一個角色,畀佢哋喺電影裏面同喜羊羊 crossover。呢個新角色個名叫「小龍」,名副其實係一條龍嚟 o架,話襯番出年係龍年喎,但華華望一望佢個造型,佢並唔係中國傳統有角嘅龍,而係一條恐龍……張玲兒話「小龍」本身係一套卡通片嘅主角,喺內地播咗 3年都好受歡迎,相信今次會同喜羊羊有火花,仲會教喜羊羊打功夫㖭!出動到 Chinese Kung Fu,希望外國觀眾真係 like啦!
http://hk.apple.nextmedia.com/template/ ... id=6339612